Lluka: Vushtrria do të jetë pjesë e projekteve zhvillimore

Prishtinë, 03.07.2018 - Ministri i Zhvillimit Ekonomik, Valdrin Lluka sot vizitoi Komunën e Vushtrrisë, me ç’rast u takua me kryetarin e komunës, Xhafer Tahiri, të cilit  i ka ofruar mbështetje në realizimin e projekteve, të cilat do të ndikojnë direkt në mirëqenien e qytetarëve të Komunës së Vushtrrisë.

Ministri Lluka tha se me kreun e Vushtrrisë biseduan për projektet strategjike të komunës, siç janë projekti i trajtimit të ujërave të zeza, energjia dhe  mundësitë e zhvillimit të një zone ekonomike.

“Pa furnizim të rregullt me energji elektrike nuk mund të ketë zhvillim të qëndrueshëm ekonomik, andaj ne si MZHE-së jemi të gatshëm të iu mbështesim në realizimin e projekteve të komunës së Vushtrrisë dhe shembulli më i mirë i bashkëpunimit në realizimin e projekteve është kyçja e Shkollës së Mesme Teknike në projektin e efiçiencës së energjisë”, tha ministri Lluka.

Duke u ndalë te sektori i ujit, Lluka tha se MZHE së bashku me Qeverinë e Zvicrës kanë një projekt në vlerë prej 18 milionë euro, ku 8 milionë janë nga buxheti i Kosovës, ndërsa pjesa tjetër nga donacionet, që ka për qëllim integrimin e të gjitha fshatrave në ujësjellësin rajonal, pjesë e të cili do të jetë edhe Komuna e Vushtrrisë.

Gjithashtu, kreu i MZHE-së tha se duke pasur parasysh se në Prishtinë dhe Mitrovicë janë duke zhvilluar projekte për trajtimin e ujërave të zeza, do të shihen mundësitë që kjo komunë të përfshihet në këto projekte dhe të plotësohet zingjiri i trajtimit të ujërave të zeza në këtë rajon.

Gjatë këtij takimi u diskutua edhe për zonat ekonomike duke ditur që Vushtrria ka  pozitë të përshtatshme për zhvillim ekonomik, pasi ka qasje në autostradë dhe hekurudhë dhe ka në dispozicion 250 hektarë që është një hapësirë perfekte për zhvillimin e një zone ekonomike.

Ndërkaq,  kryetari i Komunës së Vushtrrisë, Xhafer Tahiri falënderoi ministrin Lluka për vizitën ndërkohë që shprehu gatishmërinë e tij për bashkëpunim edhe në të ardhmen në realizimin e projekteve të përbashkëta.
 

KOSOVO IN UNESCO